Profile

Layout

Cpanel

Свт. Тихон. Христос грешную душу к Себе призывает.

Lik-Iisusa

 

 

Свт. Тихон. "Христос грешную душу к Себе призывает."

 

Почто ты, человече, Мене оставил?

Почто тебе Возлюбившаго отвратился?

Почто паки (опять) пристал к врагу Моему?

Помяни, яко тебе ради с небеси снидох.

Помяни, яко тебе ради плоть бых (принял плоть).

Помяни, яко тебе ради от Девы родихся.

Помяни, яко тебе ради младенствовах (был младенцем).

Помяни, яко тебе ради смирихся.

Помяни, яко тебе ради обнищах.

Помяни, яко тебе ради на земли пожих.

Помяни, яко тебе ради гонение претерпех.

Помяни, яко тебе ради злословие, поношение, ругание, безчестие, раны, заплевание, заушение, насмеяние, укоризненныя страсти приях (принял).

Помяни, яко тебе ради “со беззаконными вменихся” (был причтен к беззаконникам).

Помяни, яко тебе ради поносною смертию (смертью, сопровождавшейся поношениями) умер.

Помяни, яко тебе ради погребен бых.

С небесе снидох, чтобы тебе на небо возвести.

Смирихся, чтобы тебе вознести.

Обнищах, чтобы тебе обогатить.

Обезчестихся, чтобы тебе прославить.

Уязвихся (принял раны), чтобы тебе оживить.

Ты согрешил, а Я грех твой на Себе взял.

Ты виноват, а я казнь приял.

Ты должник, а я долг заплатил.

Ты на смерть осужден, а Я за тебе умер.

Но к сему любовь Моя, милосердие Мое привлекло Мене. Не мог Я терпеть, чтобы ты в таком страдал злополучии.

Сию ли ты Мою любовь пренебрегаешь?

Вместо любви ненависть воздаешь.

Вместо Мене грех любишь.

Вместо Мене страстем работаешь.

Но что ты сыскал во Мне отвращения достойное?

Чего ради не хочешь ко Мне приити?

Добра ли себе хочешь? Всякое добро у Мене.

Блаженства ли хочешь? Всякое блаженство у Мене.

Красоты ли хочешь? Что краснейше паче (больше) Мене?

Благородства ли хочешь? Что благороднее Божия Сына и Девы?

Высоты ли хочешь? Что выше Царя небесе?

Славы ли хочешь? Кто славнее паче Мене?

Богатства ли хочешь? У Мене всякое богатство.

Премудрости ли хочешь? Я премудрость Божия.

Дружества ли хочешь? Кто любезнее и любительнее паче Мене, Иже душу за всех положил?

Помощи ли ищешь? Кто поможет, кроме Мене?

Врача ли ищешь? Кто исцелит, кроме Мене?

Веселия ли ищешь? Кто увеселит, кроме Мене?

Утешения ли в печали ищешь? Кто утешит, кроме Мене?

Покоя ли ищешь? у Мене обрящеши (найдешь) покой души твоей.

Мира ли ищешь? Аз есмь (Я есть) мир душевный.

Живота (жизни) ли ищешь? У Мене источник живота.

Света ли ищешь? “Аз есмь свет миру”.

Истины ли ищешь? Аз есмь истина.

Тути ли ищешь? Аз есмь путь.

Вождя ли к небеси ищешь? Аз есмь вождь верный.

Что убо (что же), чесо ради (чего ради) не хочешь приити ко Мне?

Приступить ли не смеешь? К кому удобнейший приступ (доступ)?

Просить ли опасаешься? Кому Я просящему с верою отказал?

Грехи ли не допущают тя? Я за грешников умер.

Смущает ли тя множество грехов? Более у Мене милосердия.

Приидите ко Мне вси труждающиися и обремененнии, и Аз упокою вы”.

Молитвословия новомученикам

Стихиры новомучеников, гласъ 6:

Аще и разорени быша храми и монастыри от рукъ беззаконныхъ, и вси хотящии благочестно жити гоними быша, обаче не оскуде земля русская исповедники новыми, иже от всехъ пределъ ея благоухание подвиговъ своихъ и кровь мучения Богу принесоша, и ныне несредственне прославльшему ихъ Христу предстояще, молятся прилежно о насъ, любовию совершающихъ светлое ихъ торжество.

Киими похвальными венцы увяземъ новомученики Христовы; разделенныя телесы и совокупленныя духомъ, новозакланныя агнцы отъ земли Русския: ови убо безъ милости убиени быша, ови же во изгнаниихъ и темницахъ безвестно умроша: сихъ бо воистинну достойно безсмертныя славы венцы венчаетъ Христосъ Богъ нашъ, имеяй велию милость.

 

Ины стихиры, гласъ 4:

Избраннии от Бога святии сродницы наши, въ мiре пожившии, обаче от мiра не сущии, вы есте соль земли нашея воистинну, вами бо гради и веси наша освящаются, и пути стропотныя жития исправляются, заблуждшыя къ покаянию обращаются, и вси прославляютъ дивнаго во святыхъ Своихъ Иисуса Всесильна, Спаса душъ нашихъ.

Святителие, преподобнии и праведнии, блаженнии, исповедницы и мученицы, именованнии и безъименнии, явленнии и неявленнии, якоже отреби миру бысте, и попрание сыномъ века сего, обаче славу многу от Бога приемше, любовию васъ поющыя не презрите, расточенныя соберите, падшыя восставите, вы бо есте Святыя Руси утверждение.

 

Тропарь собора святыхъ, в земли Липетстей просиявшихъ. Гласъ 4:

Днесь радуется светло Липецкая земля, прославляющи святыя своя, верно Господеви послужившия и Церковь Русскую украсившия: о, предивнии сродницы наши, святителие, преподобнии, новомученицы и исповедницы, въ подвизехъ и страданиихъ Богу угодивши, и образъ благочестия въ житии намъ показавшии, Отечество наше соблюдите въ мире и благоденствии, и на пути земнаго странствия нашего теплии заступницы и споспешницы будите, посреде искушений же и бедъ къ вечному Отечеству насъ приводящии.

 

Кондакъ, гласъ 3:

Ныне являетъ Церковь Русская соборъ святыхъ земли Липецкия, престолу Пресвятыя Троицы предстоящихъ, и о спасении нашемъ присно ходатайствующихъ, имже и мы благодарственная пения приносимъ и согласъно вопиемъ: радуйтеся, предивнии чудотворцы, и теплии о насъ предъ Богомъ молитвенницы.

 

Икосъ:

Егда разделяше Вышний языки, яко разсея сыны Адамовы, постави пределы языковъ по числу Ангелъ Божиихъ, всякому месту, граду и стране Ангелы хранители даровавъ, тойже Промыслитель и всеблагий Богъ, духомъ любве своея созидаяй Церковь, молитву святыхъ сродниковъ нашихъ о земнемъ отечестве ныне приемлетъ, и насъ собираетъ въ торжестве ихъ согласъно пети: радуйтеся, предивнии чудотворцы, и теплии о насъ предъ Богомъ молитвенницы.

 

Светиленъ святыхъ:

Благоуханныя цветы райския, от земли нашея дивно прозябшыя, и верныхъ сердца веселящыя: соборъ святыхъ Липецкихъ днесь почитаемъ, и славимъ Бога, прославльшаго ихъ.

 

Седаленъ, гласъ 4:

Чудо велие явися намъ въ последняя дни, яко молитвами новыхъ мучениковъ своихъ помяну ны Господь во смирении нашемъ, и возвеличи, ихъ ради, Церковь Российскую, верою и любовию яко Бога Его величающую.

 

Ин седаленъ, гласъ 4:

Иже добродетелей подвижницы, от Липецкия земли возсиявшии, яко истиннии воини Христа Бога, во всяцемъ чину и всякимъ подвигомъ Тому угодившии, Духа Святаго сосуди честнии, егоже действиемъ светло украшени, верныя ко спасению наставляете: но яко имуще дерзновение ко Святей Троице, поминайте земное отечество ваше, и не забудите посещати чада своя, верою и любовию васъ почитающыя.

 

Стихира, гласъ 6. Творение свт. Афанасия Ковровского:

Ежелетнюю память днесь святыхъ сродниковъ нашихъ совершающе, достойно сия да ублажимъ. Тии бо воистинну чрезъ вся блаженства Господня проидоша: обнищавше бо духомъ, обогатишася и кротцы бывше, землю кроткихъ наследоваша; плакавшее, утешишася: алкавше правды, насытишася; миловавше, помиловани быша: чисти бывше сердцемъ, Бога якоже мощно узреша; миротворивше, Божественнаго сподобишася сыноположения; гоними же и мучими правды ради и благочестия бывше, на небесехъ ныне веселятся и радуются, и прилежно молятся Господеви помиловатися Отечеству нашему.

Восстановление монастыря

Комментарии